Ырыам кута Лэгэнтэй

5-с төгүлүн Эстрада государственнай театра «ЫРЫА КУТА» тыыннаах музыка проега дьону тоҕуоруһа муһан, көрөөччү кутун тутан, ирэ -хоро кэпсэтэн, «Версаль» музыкальнай салоҥҥа ырыа алыптаах киэһээтин бэлэхтээтэ. Бу сырыыга СР культуратын туйгуна ЛЭГЭНТЭЙ ырыа кутун дьонугар күндүлээтэ. Сырдык, аһаҕас кэпсэтии дьону туспа эйгэҕэ киллэрдэ. Түһүлгэбит Иннокентий саҥа клибын сүрэхтээһинтэн саҕаланна. «Сайыҥҥы ардах», «Таптал хатыҥа», «Махтана санаатым», «Ол саха буолбатах» уо.д.а ырыалар истээччилэри турукка киллэрэн ылла. Бу сырыыга проект музыканнарынан буоллулар Лэкиэс, Герасим Павлов, Валентин Парфенов уонна Егор Ефимов. Проект усулуобуйатынан коллега ырыатын толоруохтааххын, онно «убайын», СР үтүөлээх артыыһын Аскалон Павлов «Чуумпуга» ырыатын ыллаан хабыллар ытыс тыаһа тохтоло суох ырыаһыт уолга ананна. Биир ирдэбилинэн нуучча, эбэтэр омук хит ырыатын толоруу, онно эмиэ кыайа-хото Владимир Кузьмин «Сказка моей жизни» уонна грузинныы «Чито-грито» диэн ырыалары астыктык ыллаан сүргэбитин көтөхтө. Лэгэнтэйгэ ыйытыы арааһа, баҕа санаа бастыҥа киирэн өссө кынаттанна.