Светлана Диодорова-Лаврентьева
Ыам ыйын 6 кунэ 2026с. — испиктээх «Кыьыл кун»
«Ю.Е. Платонов аатынан Государственнай Эстрада театра, быйылгы бүтүн Россиятааҕы «Кыһыл көмүс мааска» театральнай фестивальга номинант буолан, Москва сценатыгар «Кыһыл күн» (Богровое солнце) этно-фьюжн рок мюзиклы көрдөрдө.
Саха үгэһин, сиэрин, иитиитин, культуратын ураты форматка Любовь Готовцева суруйбут. Музыкатын Варвара Васильева — Максима айбыт. Сүрүн режиссёр Татьяна Чаранская сценаҕа буһаран — хатаран туруорбут. Мюзикл сир Ийэҕэ сырдык-хараҥа, үчүгэй-куһаҕан, охсуһуутун, ил-эйэ олохсуйуутун сэһэргиир, артыыстар толору ырыанан ыллаан көрдөрөллөр. Сценография сатабылынан, уот күүһүнэн ыар баттык, нүһэр кэм турара, оннооҕор бүтэй куйаас сатыылаабыта биллэр. Мюзиклы Клавдия, Герман Хатылаевтар төрүт дорҕоонунан, Эстрадабыт театрыгар соторутааҕыта тэриллибит ВИА ситэрэн биэрдилэр. Тыыннаах музыка — өрүү тыыннаах! Уолаттар турукка киирэн, көрөөччү кылын таарыйан, дууһатын арыйан, сорох сиргэ ытатан, ыллатан оонньоотулар. Хас биирдии артыыс дууһатын ууран, көрөөччүнү кытта көстүбэт ситими тардан оонньоото. Кими даҕаны чорбоппоппун, бары үчүгэйдэр!
Аттыбар олорбут Брянскайтан сылдьар көрөөччү, сотору-сотору хараҕын уутун соттубута элбэҕи этэр дии саныыбын. Бэйэм эмиэ сорох диалогтарга хараҕым ууланна… Тахсан иһэн биһиги үгэспитин билбэт Москва театраллара астыммыттарын көрөр, санааларын истэр ураты буолла. Журналист идэлээх буоламмын көрөөччү эмоциятын, хараҕын кэтиибин. Кинилэр астыммыт, сөхпүт буоллахтарына Москваҕа олорор биир дойдулаахтарбыт төһөлөөх үөрдүлэр, дуоһуйдулар. Көрөргө ураты этэ!
Иннэ-кэннэ биллибэт уустук кэмҥэ, дуоһуйууну бэлэхтиир биллэн турар уустук. Биир бэйэм астынным, үөрдүм уонна киэн тутуннум! Мюзиклга турбутун курдук ил-эйэ эргийдин, нус-хас эйэлээх олох баар буоллун.»
